"Барселона" клубунун футболчулары "Валенсияны" 7:0 эсебинде утушту, Лионель Месси карьерасындагы 500-голун киргизди

4-февралга караган түнү футбол боюнча Испания Кубогунун жарым финалында "Барселона" клубу өз үйүндө "Валенсияны" кабыл алды. Беттеш 7:0 эсебинде аяктап, "Барса" финалга олуттуу кадам таштады.

Беттеш курч мүнөздө башталып, үй ээлери алгачкы мүнөттөрдөн баштап үстөмдүк орнотушту. Жыйынтыгында Луис Суарес 4 гол киргизсе, Лионель Месси 3 гол жаратты. Каталондуктардын дагы бир чабуулчусу Неймар пенальтиден гол киргизүү мүмкүнчүлүгүн колдоно алган жок.

"Валенсия" беттештин 45-мүнөтүндө борбордук коргоочусунан айрылды. Мессиге карата орой оюну үчүн Мустафиге кызыл айып кагазы көрсөтүлүп, майдандан четтетилди.

Командалардын ортосундагы жооптук беттеш 11-февралда орун алат. Экинчи жарым финалдык беттеш "Сельта" жана "Севилья" командаларынын ортосунда болот.

Бул беттеште Лионель Месси карьерасындагы 499-голун, 500-голун жана 501-голун киргизди. Анын ичинен футболчу 436 голду "Барселона" футболдук клубунун курамында, 49 голун Аргентинанын курамында киргизген. Ошондой эле Аргентинанын жаштар курамасында ойноп жүргөндө өз эсебине 14 гол, олимпиадалык курамада ойноп жүргөндө 2 гол жаза алган.