Кара-Балтада 54 жаштагы жаран оюн учурунда өзүн атып алды

Кара-Балта шаарында 54 жаштагы жаран кокусунан өзүн өзү атып алганын 4-февралда Чүй ОИИББинин басма сөз кызматы билдирди.

Маалыматка караганда, бир нече күн мурун аймактык бейтапканага 54 жаштагы адамды оор жаракаты менен алып келишкен. Көрсөтүлгөн жардамга карабай бейтап өзүнө келбей жатып жан берген.

Тергөө иштеринин алкагында маркум кокусунан өзүн атып алганы аныкталган. Кырсык болгон түнү маркум үйүнө досторун чакырып, спирт ичимдиктери ичилгенден кийин ок атуучу куралын чыгарып, орус рулеткасын ойноону сунуштаган. Оюн учурунда курал менен атканда ок чыкпай калган. Андан кийин өзүнүн башына атканда ок чыгып, ал каза болгон.