Өкмөт башчы: "Авиабилеттерге бааны төмөндөтүп, аэропорттун тейлөө сапатын жакшыртуу зарыл"

Темир Сариев Ош шаарындагы "Манас" Эл аралык аэропортунун филиалын реконструкциялоонун жүрүшү менен таанышуу учурунда "авиабилеттерге бааны төмөндөтүп, аэропорттун тейлөө сапатын жакшыртуу зарыл" деп билдирди. Бул тууралуу 5-февралда өкмөттүн басма сөз кызматы маалымдады.

"Аэропорттон түшкөн кирешеге Тамчы, Жалал-Абад жана Баткендеги аэропортторду реконструкциялоо керек. Быйыл Тамчы-Бишкек, Тамчы-Алматы, Тамчы-Жалал-Абад, Тамчы-Ош багытындагы жаңы каттамдар ачылат. Авиабилеттерге бааны төмөндөтүп, аэропорттун тейлөө сапатын жакшыртуу зарыл, ага жараша жүргүнчүлөрдүн агымы да жогору болот. Кыска мөөнөт ичинде өлкө аэропортторун өнүктүрүү программасын ишке ашырууну жыйынтыктоо зарыл",- деди премьер-министр.

Өкмөт башчыга маалымдалгандай, 2015-жылы Ош шаарынын аэропортунун кирешеси 400 миллион сомду түзгөн, ал эми жүргүнчүлөр агымы өткөн жылдарга салыштырмалуу төрт эсеге жогорулаган. Премьер-министр билдиргендей, Ош шаарынын аэропортун реконструкциялоого 15 миллион сом бөлүнгөн, учурда мында учуп келгендер жана учуп кетүүчүлөр үчүн төрт зал курулууда.