Москвада өрттөн каза болгондордун ДНК анализдеринин жыйынтыгы чыкты. Өкмөт аларды мекенине алып келүүгө 700 миң сом бөлдү

Өкмөт Орусиянын Москва шаарында өрттөн каза болгондордун сөөктөрүн кыргыз жерине алып келүү үчүн 700 миң сом бөлдү. Бул тууралуу вице-премьер-министр Гүлмира Кудайбердиева Москвада жумушчу жыйында айтканын өкмөттүн маалымат кызматы билдирди.

Айта кетсек, Москва шаарынын Стромынка көчөсүндөгү тигүү ишканасындагы өрттөн 12 адам, анын ичинен 3 кичинекей бала каза тапкан. Алардын ичинде 8 кыргыз жараны, Орусиянын жарандыгын алган кыргыздардан жана өзбек жарандарынан экиден адам болгон. Адам өлүмүнө алып келген өрт кырсыгына байланыштуу кылмыш иши козголгон.

Өрттөн каза болгон кыргыздардын жакындары 2-февралда Орусияга учуп кетишкен. 3-февралда КРнын Орусиядагы элчилигинин кызматкерлери соттук-медициналык бюронун эксперттери менен жолугушуп, ДНКнын анализдерин тез арада чыгарып берүүнү суранышкан. Өкмөттүн басма сөз кызматы бүгүн, 10-февралда ДНК анализдери чыкканын кабарлады. Каза болгон кыргыз жарандарынын сөөктөрү туугандарына берилип, "Жүк-200" кыргыз жерине алынып келет.