Ысык-Көлдө өспүрүмдөр чек арачылардын кызматы менен таанышышты

Бүгүн, 11-февралда Кыргыз Республикасынын Мамлекеттик чек ара кызматынын Ысык-Көл облусунун Каракол шаарындагы бөлүмүндө Ачык эшиктер күнү өттү. Бул тууралуу аталган кызматтын басма сөз кызматы билдирди.

Иш-чара Ак-Суу, Жети-Өгүз райондорунун жалпы билим берүү мекемелеринин жана Токтогул Сатылганов атындагы Ысык-Көл облустук жатак-мектебинин катышуучулары үчүн, Ооганстандан советтик аскерлердин чыгарылган жана Ата Мекенди коргоочулардын күнүнө карата уюштурулду. Окуучуларга былтыр 50 жылдыгы болгон аскердик бирикме тууралуу окуялар айтылды.

"Биздин аскер бөлүмүбүздүн тарыхына Ооганстанда өзүнүн жоокердик милдетин аткарган жана өзүнүн жанын аябай Ата Мекенин коргогон баатыр чек арачылардын ысымдары жазылган. Бүгүн биз ал баатырлар тууралуу айтып, алар тууралуу эстеп эле койбостон, жаш муунга жердештери менен сыймыктанууга жана эл-жерин сүйүүгө үйрөтүп жатабыз",- деди Кыргыз Республикасынын Мамлекеттик чек ара кызматынын Ысык-Көл облусу боюнча башчысы Руслан Закиров.

Андан соң курал-жарактар, байланыш каражаттары жана чек арачылар кызмат маалында колдонгон техникалар көрсөтүлүп, өспүрүмдөр үчүн аскердик бөлүмдүн аймагында экскурсия өттү. Окуучулар аскерлер менен сүйлөшүп, алардын кызматы тууралуу маалымат алышты. Атайын багыттагы жоокерлердин оксуз кармашуусу окуучулардын арасында чыныгы кызыгууну жаратты.