Азия чемпиондугунда футзал боюнча улуттук курам бүгүн Сауд Арабиясына каршы ойнойт

Бүгүн, 14-февралда Өзбекстандын Ташкент шаарында футзал боюнча Азия чемпиондугунун 3-тур оюндары орун алат. "А" тайпасында кыргыз футболчулары Сауд Арабиясына каршы беттешке чыкса, Ливан курамасы Өзбекстан менен беттешмекчи. Бул тууралуу мелдештин расмий сайты кабарлайт.

Маалыматка ылайык, 3-тур оюндарына саат 18:00дө старт берилет (Бишкек сааты боюнча).

Кошумчалай кетсек, "А" тайпасында Өзбекстан 1-орунду ээлеп, кийинки турга чыкты. 2-орунду кайсы команда ээлей турганы 3-турда билинет.

2 турдун жыйынтыгы боюнча тайпада Өзбекстан курамасы 6 упайы менен лидерликте турат. Ливан курамасында 2 упай болсо, Сауд Арабиясы менен өлкөбүздүн курамасында бирден упай бар.

Кыргыз футболчуларынын кийинки турга чыгар-чыкпасы Өзбекстан - Ливан беттешиндеги жыйынтыктан көз каранды. Эгер өзбек футболчулары жеӊишке жетишсе, кыргыз футболчулары Сауд Арабиясын утуу менен кийинки турга чыга алышат.

Назарыӊыздарга "А" тайпасында алгачкы 2 турда катталган жыйынтыктарды коймокчубуз:

10-февраль, 1-тур.

Ливан - Кыргыз Республикасы - 4:4

Өзбекстан - Сауд Арабиясы - 5:2

12-февраль, 2-тур

Сауд Арабиясы - Ливан - 3:3

Кыргыз Республикасы - Өзбекстан - 1:2