Ысык-Көлдөн эшек уурдап союп, терисин Бишкекке алып келип саткан жигиттер колго түшүштү

Ысык-Көл облусунда ыкчам издөө ишинин жүрүшүндө 3 адам эшек уурдоого шектелип кармалды. Алар эшектерди союп, терисин Бишкекке алып келип сатышкан. Муну 15-февралда Ысык-Көл ИИБинин басма сөз кызматынан билдиришти.

Маалыматка караганда, Ысык-Көл районуна караштуу Корумду жана Жаркынбаев айылдарынын тургундары териси жок эшектин этин тапкандыктарын билдиришкен. Бул факт боюнча ыкчам иликтөө иштери жүрүп, натыйжада 29 жаштагы Нарын облусунун тургуну С.Шабдан жана Жети-Өгүз районунун Светлая Поляна айылынын тургундары 29 жаштагы Д.Анвар, 31 жаштагы Элдияр К. уулу кармалышкан. Алар түн ичинде эшектерди уурдап, ээн талаага айдап барып, ал жактан терилерин сыйрып алышкан. Кылмышка шектүүлөр 4 баш эшекти уурдагандарын жана алардын терилерин Бишкекте 4-5 миң сомдон сатышканын айтышкан. Азыркы тапта факт боюнча иликтөөлөр жүрүп, шектүүлөр убактылуу кармоочу жайына жеткирилишкен.