Екатеринбургда кыргыз жараны күйөөсүнүн көңүлдөшү кетип бараткан поезддин ичинде бомба бар деп жалган маалымат тараткандыгы үчүн 80 миң рубль айыпка жыгылды

Екатеринбург шаарынын тургуну Дилорам Абаева "теракт даярдалып жатат" деген жалган маалыматты Орусиянын күч органдарына бергендиги үчүн айыпталып, 80 миң рубль айыпка жыгылды. Бул тууралуу 18-февралда "Иннов.ру" маалымат агенттиги жазып чыкты.

Маалыматка караганда, 28 жаштагы кыргыз жараны күч органдарына "Новосибирск - Адлер каттамына чыкканы жаткан поезддин ичинде жарылуучу зат бар" деп билдирген.

Кыргыз жаранынын мындай маалыматты бергенине үй-бүлөсүн сактап калуу аракети себеп болгон. Анын айтымында, күйөөсүнүн көңүлдөшү ошол каттам менен Ростов-на-Дону шаарына иш сапарга кеткен күйөөсүнүн артынан бараткан. Ал муну менен поездди кармап калууну чечкен. Соттук процесс учурунда аял Екатеринбург шаарынын тургундарынан кечирим сураган. Ал эми баласынын мындай жолго барганын ата-энеси туура көрбөй, келинин жактап беришкен. Сот Д.Абаеваны 2015-жылдын 18-ноябрынан 2016-жылдын 16-февралына чейин камакта отурганын эске алып, жалган маалыматты бергендиги үчүн 80 миң рубль айып пул төлөө өкүмүн чыгарган. Айыпталуучуну сот отурум залынан бошоткон.