Таиланддагы күрөш боюнча Азия чемпиондугунда кыргыз балбандары азырынча 1 күмүш, 2 коло медаль тагынышты

17-февралда Таиланддын Бангкок шаарында күрөш боюнча Азия биринчилиги старт алды. Мелдештин биринчи күнүндө кыргыз балбандары 3 медаль тагынышты. Бул тууралуу мелдештин расмий сайты кабарлайт.

Маалыматка ылайык, мелдештин биринчи күнүндө грек-рим күрөшү боюнча 5 комплект медаль ойнотулду. Бул күнү кыргыз балбандарынан Мурат Рамонов 130 килограмм салмакка чейинки бөлүктө күмүш тагынса, Руслан Царев (75 килограмм салмакта) менен Үзүр Жузупбеков (98 килограмм салмакта) коло медалдарды тагынышты.

Мелдештин экинчи күнүндө дагы 5 комплект медаль ойнотулат. Бул күнү кыргыз балбандарынан Калыбек Жолчубеков (59 кг) жана Жанарбек Кенжеев (85 кг) финалда күрөшүп, алтын медалга аракет кылышмакчы. К.Жолчубеков финалда ирандык Саман Морад Абдоули менен беттешсе, Ж.Кенжеев өзбек балбаны Мухаммадали Шамсиддиновго каршы турат.