6 жаштагы Адылхан 1 мүнөттө 91 ирет "отжимания" жасап, "Гиннесстин рекорддор китебине" атын жазат

Талас облусунун кулуну Адылхан Мадалбек уулу 1 мүнөт ичинде 91 ирет "отжимания" жасап, "Гиннесстин рекорддор китебине" атын жазуу алдында турат. Бул тууралуу SUPER.KG порталына анын окутуучусу, Ташчайнар аты менен белгилүү болгон Нурлан Алишеров кабарлады.

Маалым болгондой, 6 жаштагы жаш талант 6 айдан бери Ташчайнардын колунда тарбияланып келет. "Буга чейин бул куракта мындай өнөр жасаган балдар катталбаптыр. Адылхан муну биринчилерден болуп жасап, атактуу китепке өз ысымын киргизмекчи",- дейт Н.Алишеров.

Аталган өнөр менен "Гиннесстин рекорддор китебине" киргендер аз эмес. Алардын көбү көнүгүүнүн санына (ылдамдыкка эмес) көңүл бурушат. Алгачкы рекордду Чарльз Линстер аттуу спортчу 1965-жылы жараткан. Ал тынбай 6006 жолу бул көнүгүүнү жасаган.

Ылдамдык жагынан британиялык Саймон Кент 2002-жылы рекорд коюп, 1 мүнөттө 140 ирет бул көнүгүүнү аткарган.