Ысык-Көлдө күйөөсү аялын отургучтун буту менен башка чаап өлтүрүп, андан кийин өзү асынып алды

Ысык-Көл облусунда күйөөсү аялын отургучтун буту менен башка чаап өлтүрүп, андан кийин өзү асынып алды. Бул тууралуу бүгүн, 22-февралда Ысык-Көл облустук ички иштер башкармалыгынан билдиришти.

Маалыматка ылайык, 21-февраль күнү саат 09:30 чамасында Түп райондук ички иштер башкармалыгына Байзак айылындагы үйлөрдүн биринен 40 жаштагы күйөөсүнүн жана 32 жаштагы аялынын жансыз денелери табылгандыгы тууралуу маалымат келип түшкөн. Окуя болгон жерге барган милиция кызматкерлери 32 жаштагы К.Заринанын башында көптөгөн жаракаттар бар экенин аныкташкан. Далил буюм катары канга боёлгон отургучтун жыгач буту табылган. Үйдүн короосундагы сарайдын ичинен 40 жаштагы А.Мирландын асынган денеси табылган. Анын жанынан "20-февраль күнү Зарина мас абалда келген, экөөбүздүн ортобузда уруш чыкты. Мен ачууланып аны бир нече жолу отургучтун буту менен башка чаап, өлтүрүп алдым. Кылганыма өкүнүп, өз жанымды кыйганга бардым" деп жазылган кат табылган.

Каза болгон күйөөсү менен аялынын ортосунда 13 жаштагы уулу жана 7 жаштагы эгиз кыздары калды. Бул факт боюнча соттук-медициналык экспертиза дайындалып, учурда иликтөө иштери жүрүүдө.