Каржы министрлигине түрк делегациясы иш сапары менен келди

"Кыргыз Республикасынын финансыларын башкаруу маалыматтык системин иштеп чыгуу жана ишке киргизүү" долбоорунун алкагында Кыргыз Республикасынын Каржы министрлигинин компетенттүү өкүлдөрү менен консультацияларды жүргүзүү, жумушчу топторду түзүү жана бюджетке, казынага байланыштуу маселелерди изилдөө максаттарында түрк делегациясы бүгүн Каржы министрлигинин астанасын аттады. Бул тууралуу аталган министрликтин басма сөз кызматы билдирди.

Иш планына ылайык түрк делегациясы кыргыз жергесинде үстүбүздөгү жылдын 5-мартына чейин жүрөт. Көрсөтүлгөн мезгилде финансы боюнча түрк адистери өлкөнүн мамлекеттик башкаруу түзүмүн, программалык камсыздоо функцияларын жана техникалык инфраструктураны, бухгалтерия процессин жана мамлекеттик уюмдардын бириндеги чыгашаларды, кирешелер системи жана салыктар системи менен байланышкан техникалык интеграция үчүн муктаждыктарды, жергиликтүү бюджетине тиешелүү болгон аймактык башкармалыкты же облустук казына дирекциясын изилдешет, ошондой эле түрк делегациясы борбордук бюджетти даярдоо процесстеринин, карызды башкаруу процесстеринин, чыгашалар жана бухгалтердик эсеп процесстеринин, жергиликтүү администрация тарабынан бюджетти даярдоо жана ишке ашыруу процессинин, нак акча каражаттарын башкаруу процесстеринин, бюджетти ишке ашыруу процесстеринин, бухгалтердик эсеп жана нак акча каражаттарын башкаруу процесстери боюнча техникалык талаптарды аныктоонун үстүнөн иштейт.

Эске сала кетсек, 2015-жылдын 18-ноябрында Кыргыз Республикасынын Каржы министрлигинде министр Адылбек Касымалиев менен Түркия Республикасынын Премьер-министринин аппаратына караштуу Түрк кызматташуу жана координациялоо агенттигинин Борбордук Азия жана Кавказ долбоорлору боюнча башкармалыгынын башчысы Али Өзгөн Өзтүрк мырзанын жолугушуусу болуп өткөн. Жолугушуунун жыйынтыгында "Кыргыз Республикасынын мамлекеттик финансыларын башкаруунун маалыматтык системин иштеп чыгуу жана киргизүү" долбоору боюнча кызматташуу жөнүндө протоколго кол коюлган.