Шаардык кызды Кочкор районуна ала качып кеткен жигит менен досу камакка алынды

Шаардык кызды Кочкор районуна ала качып кеткен жигит менен досу камакка алынды. Бул тууралуу бүгүн, 23-февралда SUPER.KG порталына Чүй облустук ички иштер башкы башкармалыгынан билдиришти.

Маалыматка ылайык, милицияга арыз менен 20 жаштагы Керез аттуу шаар тургуну кайрылган. Анда ал 2015-жылдын 21-декабрында саат 13:30 чамасында Лебединовка айылындагы үйүнүн жанынан белгисиз эки адам күч колдонуу менен аны белгисиз үлгүдөгү унаага салып кеткенин билдирген. Бир нече саат жол жүргөндөн кийин бейтааныш жигиттер аны Кочкор районуна алып келишип, Мирлан аттуу жигитке турмушка чыгууга мажбурлашканын айткан.

Жүргүзүлгөн иликтөө иштеринин алкагында 14-январь күнү кылмышка шектүү катары 23 жаштагы Кочкор районунун Мирлан аттуу тургуну кармалган. Ал өз көрсөтмөсүндө кыз менен тааныш эместигин, аны сыртынан байкап, көптөн бери жактырып жүргөнүн айткан. Ошол себептен улам жабырлануучуну өз айылына ала качып, ага үйлөнгүсү келгенин билдирген. Аталган кылмышка катыштыгы бар деп Мирланды коштоп барган Кайрат аттуу жигит да камакка алынган. Кылмышка шектүүлөргө карата “аялды никеге турууга мажбурлоо, никеге туруу үчүн аны ала качуу же анын никеге турушуна тоскоолдук кылуу” беренеси менен кылмыш иши козголду. Учурда кылмышка шектүүлөр убактылуу кармоочу жайга киргизилип, иликтөө иштери жүрүүдө.

Кылмышка шектүүлөрдүн күнөөсү аныкталса, 5 жылдан 7 жылга чейин эркинен ажыратылышы мүмкүн.