Түркия. Өлкө президентине сын айтып келген легендарлуу футболчу Хакан Шүкүр 4 жылга камалышы мүмкүн

Түркия курамасынын жана "Галатасарай" футболдук клубунун легендарлуу чабуулчусу Хакан Шүкүр өлкө президенти Тайип Эрдогандын жана анын уулунун дарегине айтылган сындары үчүн абакка камалышы мүмкүн. Бул маселе боюнча отурумдун убактысы жакында белгилүү болорун чет элдик маалымат булактары кабарлайт.

Маалыматка ылайык, экс-футболчунун адвокаттары Х.Шүкүрдүн социалдык тармактагы билдирүүлөрү Эрдогандын үй-бүлөсүнө багытталбаганын айтып чыгышты.

Эгер футбол боюнча 2002-жылкы Дүйнө чемпиондугунда коло медаль тагынган экс-футболчунун күнөөсү далилденсе, ал 4 жылга эркинен ажыратылышы мүмкүн. Бирок анын социалдык тармактагы кайсы билдирүүсү тууралуу сөз болуп жатканы азырынча белгисиз.

Кошумчалай кетсек, футболдук карьерасын жыйыштырган соң Шүкүр саясатка аралашкан.