Өзбек чек арасынан 4 килограммга жакын маңзат менен кыргыз жараны кармалды

Кыргыз мамлекети менен Өзбекстандын чек арасында жайгашкан "Укчи-Кабристон" чек ара пунктунан 3 килограмм 800 грамм маңзатын Өзбекстандын аймагына өткөрүүгө аракет кылган кыргыз жараны кармалды. Бул тууралуу бүгүн, 26-февралда өзбекстандык басылмалар жазып чыгышты.

Анда айтылгандай, Кара-Суу районунун 32 жаштагы Э.У. аттуу тургуну маңзатты өзүнүн А.А. аттуу 45 жаштагы таанышына алып бара жатканын айткан. Ал маңзатты чек арадан өткөндөн кийин сүйлөшүлгөн жерден алып кете турганын белгилеген. Маалым болгондой, күч органдары маңзатты алып кете турган адамды да кармашып, кылмыш иши козгоду. Учурда тергөө амалдары жүрүүдө.

Маалыматты тактоо үчүн Ош ОИИББи жана Баңгизатты көзөмөлдөө боюнча мамлекеттик кызматына кайрылганыбызда аларга мындай маалымат түшпөгөнүн билдиришти.