Жол-кайгуул кызматкерин сабап, тергөөчүнүн погонун жулуп алган айдоочу 2 айга камалды

Жол-кайгуул кызматкерин сабап, тергөөчүнүн погонун жулуп алган айдоочу 2 айга камалды. Бул тууралуу SUPER.KG'ге Жалал-Абад ОИИБинин басма сөз кызматынан билдиришти.

Маалыматка караганда, 4-февраль күнү Бишкек-Ош каттамында Токтогул шаарынан болжол менен саат 14:00дө катуу ылдамдыкта бараткан Тойота Виндом үлгүсүндөгү унааны Жалал-Абад ОИИБинин
жол-кайгул кызматкери Н.А. токтоткон, бирок айдоочу баш ийбей өз жолу менен кете берген. Анын аркасынан МАИ кызматкери кубалап барган. Бишкек шаарынын 34 жаштагы Улан К. аттуу тургуну унаасынан чыгып, МАИ кызматкерин уруп жиберген. Ал эми жардамга барган Токтогул РИИБинин аймактык тергөөчүсүнүн погонун жулуп таштаган. Бул иш боюнча айдоочуга карата "бийлик өкүлдөрүнө зомбулук көрсөтүү" беренеси менен кылмыш иши козголгон. Таш-Көмүр шаардык сотунун токтому менен ал 2 айга убактылуу кармоочу жайына камакка алынды.