Жумгалда аңчылыкка чыгып, октон каза болгон өспүрүмдүн өлүмү боюнча кылмыш иши козголду. Каза болгон баланын туугандары арыз жаза элек

Жумгал районунда кокустуктан башына ок тийип каза болгон өспүрүмдүн туугандары арыз жаза элек. Ал эми факт боюнча "адам өлтүрүү" беренеси менен кылмыш иши козголгонун 26-февралда SUPER.KG порталына Нарын облустук ички иштер башкармалыгынын жетекчиси Ороз Молдосариев билдирди.

"Аңчылыкка чыккан 9-класстын окуучусу кокустук менен теңтуш тууганын атып алган. Каза болгон бала быйыл 10-класста окумак, бирок ал 9-классты бүткөн соң мектептен чыгып алган экен. Учурда каза болгон баланын туугандары тууганчылыгыбыз бар деп милицияга арыз жазбай жатышат. Нарын ОИИБи факт боюнча "адам өлтүрүү" беренеси менен кылмыш ишин козгоду. Учурда иликтөө иштери улантылууда", - деди Молдосариев.

Белгилүү болгондой, кокустук менен тууганын атып алган окуучу бала азыркы тапта үйүндө.

Айта кетсек, окуя 23-февралда орун алган. Анда Баш-Кууганды айыл аймагынын 9-класстагы окуучусу теңтуш тууганы менен аңчылыкка чыккан. Этиятсыздыктан улам 9-класстын окуучусу тууганын башка атып алып, оор жаракаттан улам ал каза болуп калган.