Орусиялык телеканал өлкөбүздөгү сындардан кийин кыргыз мамлекети тууралуу сюжеттин аталышын өзгөрттү

Орусиялык "Россия 24" телеканалы өлкөбүздө социалдык тармактардагы сындардан кийин Кыргыз Республикасы тууралуу сюжетинин аталышын өзгөрттү. Башында "Кыргызстан ИГИЛ үчүн кадр даярдоочу жайга айланды" деп берилген тема кийин "ИГИЛдин террорчуларын кантип жалдашат: атайын репортаж" деп өзгөртүлдү.

Белгилей кетсек, Орусиялык "Россия 24" жана "Россия" телеканалдары кыргыз өлкөсүн "Ислам мамлекети" тобунун мүчөлөрүн даярдоочу жай" деп атап, эфирден кыргыздардын террордук уюмга азгырылып жатышы тууралуу сюжет кетиришкен. Анда кыргыз мамлекети Орусияга аталган уюмдун өкүлдөрүнүн киришине жол ачуучу негизги каналга айланганы айтылат.

"Аталган өлкөнүн жүздөгөн жарандары учурда Сирияда согушуп жатышат, кийин алар эмгек мигранты катары тоскоолдуксуз, визасыз биздин өлкөгө кириши мүмкүн. Буга жакында эле Санкт-Петербургда бир нече жардыруу уюштурууну пландап кармалган аталган өлкөнүн жарандары мисал",- дейт "Россия" телеканалынын диктору.

Андан ары сюжетте "Ислам мамлекети" тобуна адамдарды тартууга шектелип кармалган Улукбек Убайдуллаев аттуу жарандын маеги, азгыруучулардын тузагына илинген жарандар тууралуу маалымат берилет. Телеканал баяндамачысы кыргыздар жакырчылык жана диний сабатсыздыктан улам Сирияга азгырылып жатканын айтат.

"Кыргызстанда Сириядагы жарандары эртеби-кечпи мекенине кайтып келишинен чочулашат. Бул деген алар мигрант катары кыйынчылыксыз коңшу өлкөлөргө, анын ичинде Орусияга да кириши мүмкүн дегенди билдирет",- дейт баяндамачы.