Пара менен кармалып жатып каза болуп калган Гапаровдун денесинде көк ала тактар болгону айтылды

И.Ахунбаев атындагы Кыргыз мамлекеттик медицина академиясынын аппарат жетекчиси Абдыкерим Гапаров 30 миң сом пара алып жатып кармалып, ошол учурда ал каза болуп калган. Медицина адистери Гапаровдун денесинде көк ала тактар бар экенин көрүшкөнүн академиянын басма сөз кызматкери Абибилла Пазылов SUPER.KG'ге билдирди.

“Медицина адистеринин алдын ала жүргүзгөн сырткы текшерүүсүндө маркумдун денесинен ар түрдүү жаңы көк ала тактар байкалган. Прокуратура жана милиция кызматкерлери текшергенде бөлмө ичинен отургучтардын сыныктары табылган. Ошондой эле маркумдун кол саатынын, бут кийиминин боосу үзүлгөнү, галстугу жерде жатканы, көйнөгүнүн айрылганы белгилүү болду. Биз дагы колдо болгон каражаттар менен баарын тартып алдык.

Медицина адистери "сырткы күчтүн натыйжасында жалпы инфаркт алган" деген жыйынтык чыгарып беришти. Негизи, текшерүү иштери болуп жаткан маалда адам өзүн жаман сезсе, ага карата медициналык жардам берилип, анан улантылышы керек эле. Ал адам оорулуу эле, ага бир катар медициналык жардам көрсөтөлү дегенибизге көнүшкөн эмес. Биздин кызматкерлер киргенде Гапаров жерде жаткан. Бул иш боюнча маркумдун баласы Адыл Гапаров райондук прокуратурага арыз менен кайрылды”,- деди Пазылов.