Мадрид дербисинде "Реал" футбол клубу өз үйүндө "Атлетикого" утулуп калды (фото)

Бүгүн, 27-февралда футбол боюнча Испания биринчилигинин 26-турунда мадриддик клубдар "Реал" менен "Атлетико" беттешти. "Сантьяго Бернабеу" стадионунда орун алган беттеште коноктор 0:1 эсебинде жеӊишке жетишип, 3 упайга ээ болушту. Машыктыруучу Зинедин Зидан бул кызматтагы алгачкы жеӊилүү ызасын тартты.

Бир шаардан чыккан эки команданын оюну дерби деп аталып, кайсы мелдеш экенине, кайсы команда мелдеш жадыбалында жогору турарына карабай кызуу оюн болот эмеспи. Бул беттеш да оюндун жогорку ылдамдыгы, көп эреже бузуулар менен эсте калды. Көбүнчө "Реал" топко ээлик кылуу аракетин көрүп, улам сайын демилгени колго алып жатты. Ал эми "Атлетико" арты-артынан каршы чабуулдарды уюштурду. Алгачкы тайм 0:0 эсебиндеги теӊ чыгуу менен аяктады. 2-таймда "Атлетико" кезектеги каршы чабуулдардын биринде эсепти ачты. 53-мүнөттө Антуан Гризман айырмаланды. Оюндун калган бөлүгүндө "Реал" чабуул уюштурууда атаандашка караганда мыкты болгону менен, гол киргизүү аракеттери текке кетти.

Бул жеӊиш менен "Атлетико" Испания чемпиондугунда 26 оюнда топтогон упайларынын санын 58ге жеткирип, 2-орунду ээлеп турат. Ал эми 26 оюнда 54 упай топтогон "Реал" 3-орунда келүүдө. 1-орунда "Барселона" өз атын жазып келүүдө (25 оюнда 63 упай).