Айыпталуучу Алымкулов күзөтчүлөр менен спирт ичимдигин ичип жаткан маалда качып кеткен

Каракчылык боюнча айыпталып, кийин качып кеткен Азатбек Алымкуловду алып кеткен күзөтчүлөргө карата кылмыш иши козголду. Бул тууралуу Башкы прокуратуранын маалымат кызматы 29-февралда билдирди.

Маалым болгондой, айыпталуучуну качырып жиберген Аламүдүн РИИБинин күзөтчүлөрү ошол күнү аны менен кошо жубайы жашап жаткан үйүнө барышкан. Ал жерден спирт ичимдиктерин ичип жаткан маалда Алымкулов башка бөлмөнүн терезесинен чыгып кеткен. Анын качканын күзөтчүлөр болжол менен саат 19:20да билишкен.

Алымкулов каракчылык кылмышына шектелип камакта отурган. Ал 1989-жылы 8-апрелде туулган, Нарын облусунун Жумгал районунун тургуну. Кармалганга чейин Бишкек шаарында жашап жүргөн.

Качкан жарандын белгилери: бою - 185-190 сантиметр, бет түзүлүшү сүйрү, чачы кыска. Кызыл түстүү спорттук кийим, кара түстүү спорттук шым, кара баш кийим (кепка), кара бут кийим кийип жүргөн. Шектүү жаран тууралуу маалымат билгендер Аламүдүн РИИБине (0312) 36-35-23, 43-01-27, (0701) 65-55-71, (0552) 88-88-38 телефон номурлары аркылуу чалып кабарласа болот.