Бишкекте күйөөсүн жиликтеп, анын дене бөлүктөрүн шаардын ар кайсы райондоруна таштаган келиндин соту 14-мартка дайындалды

Бишкекте күйөөсүн жиликтеп, анын дене бөлүктөрүн шаардын ар кайсы райондоруна таштаган 26 жаштагы С.Айдайдын иши боюнча биринчи соттук отурум 14-мартка дайындалды. Бул тууралуу SUPER.KG порталына бүгүн, 1-мартта Октябрь райондук сотунан билдиришти.

Маалыматка ылайык, соттук кароону Октябрь районунун судьясы Кымбат Архарова карайт.

Кылмышка шектүү 2013-жылы Кыргыз мамлекеттик медициналык академиясын бүтүргөнү маалым.

Айта кетсек, 2015-жылы 14-августта Бишкектин 5-кичи районунда таштанды челектеринин биринен эркек адамдын дене бөлүктөрү: кесилген колдору жана буттары табылган. Анын эртеси өлтүрүлгөн адамдын башы Фучик көчөсүнөн, денесинин дагы бир бөлүгү борбордогу чайканалардын биринин жанынан чемоданга салынган абалда табылган. Тергөөнүн жүрүшүндө кылмышка шектүү катары маркумдун аялы кармалып, ал кылмышын моюнга алган. Кылмышка шектүү менен маркум Эрлан Оркошов 4 жыл бирге жашашкан, ортосунда 2 уулу бар.