16 жаштагы кызга үйлөнгөн ишкер Сариев мурунку аялын кылмыш жообуна тарттырганы жатат

Бишкекте 16 жаштагы кызга үйлөнгөн ишкер Нарынбек Сариев мурунку аялынын үстүнөн арыз жазды. Муну бүгүн, 2-мартта анын мурунку жубайы Анара Сариева SUPER KG порталына билдирди.

“Жолдошум Нарынбек Сариев бизге тийиштүү мүлктү бөлгүсү келбей, мени ар түрдүү жол менен коркутуп, мүлктөн баш тартуумду көздөп жатат. Андай кыла турган болсо, мен үч балам менен кайда барам?

Кечээ кайрадан менин үстүмдөн Октябрь РИИБине арыз жазыптыр. Бул тууралуу мага тергөөчү телефон чалып кабарлады. Арызында мени "үйдөн документтерди уурдап кетти" деп жазыптыр. Бизди суракка албай туруп кылмыш ишин козгоптур. Биз чогуу жашабай калгандан кийин жолдошум документтер сакталган сейфтин кулпуларын өзгөртүп койгон. Мен документтерди баары бир ала албайт болчумун. Акыркы жолу үйгө барганымда кароолчу менен чогуу кирип кийимдеримди алып кеткем”,- дейт Сариева.

Нарынбек Сариев жубайынын үстүнөн былтыр декабрь айында да арыз жазганы айтылды. Анда жубайы шантаж кылып кыймылдуу жана кыймылсыз мүлктү өзүнө жаздырып берүүнү талап кылып жатканын айткан. Бул факт боюнча кылмыш иши козголгон, быйыл 6-февралда тамактануучу жайдан жубайы Анараны "жолдошу Нарынбектен пара алды” деп кармашкан.

"Мен юридикалык жак болбогондон кийин мени кантип "пара алды" деп айтышат? Нарынбек Сариев мени ал жерге "балдардын окуу жайына төлөгөнгө жана керектүү нерселерге жумшаганга акча берем" деп чакырган",- дейт ишкердин аялы.