Бишкекте октон жарадар болгон айым сыртта урушуп жаткандарды кароого чыккан учурда ок жегени аныкталды

Борбордо октон жаракат алган 30 жаштагы айым эки адам урушуп жатканда аларды кароого сыртка чыкканы, ошол учурда урушуп жаткандардын бири аны көздөй ок чыгаргандыгы аныкталды. Бул тууралуу SUPER.KG порталына бүгүн, 2-мартта Бишкек шаардык ички иштер башкы башкармалыгынан билдиришти.

"Учурда окуя кандай болгондугу аныкталууда. Жабырлануучу Мадинанын жана күбөлөрдүн айтымына караганда, ал күнү саат 07:50 чамасында барак тибиндеги үйдүн жанында болжол менен түрк улутундагы эки жаран ичимдик ичип, урушуп жатышкан. Ошол учурда аталган үйдө жашаган айым сыртка чыгып, аларды көрүүгө аракеттенет, аны байкаган эки жарандын бири аны көздөй ок чыгарган. Айымдын мойнуна ок эмес, анын чачырандысы тийип, ал жаракат алган. Учурда ок чыгаргандарды издөө иштери өз натыйжасын бере элек",- дейт аталган башкармалыктын басма сөз катчысы О.Казабаев.

Айта кетсек, окуя 28-февралда саат 07:50 чамасында Лев Толстой жана Термечиков көчөлөрүнүн кесилишиндеги үйлөрдүн биринин жанында болгон. Анда аталган аймактагы үйлөрдүн биринен чыккан айымды көздөй 2 белгисиз адам ок чыгарып, изин жашырып кеткен.