Баткен облусунда диний экстремисттик материалдарды сактаган жаран 1 айга камакка алынды

Баткен облусунда диний экстремисттик материалдарды сактаган жаран 1 айга камакка алынды. Бул тууралуу бүгүн, 2-мартта Баткен облустук ички иштер башкармалыгынан билдиришти.

Маалыматка ылайык, 2-февралда Баткен облусуна караштуу Кызыл-Кыя шаарынын 25 жаштагы Х.Расулов аттуу жаран кармалган. Анын уюлдук телефонунан өлкө аймагында тыюу салынган “Өзбекстан ислам кыймылы” жана “Катибат аль-Бухари” экстремисттик-террордук уюмдарына таандык сүрөттөр жана видеоматериалдар табылган.

Бул факт боюнча "экстремисттик материалдарды сатып алуу, даярдоо, сактоо, жайылтуу, ташуу жана жиберүү, ошондой эле экстремисттик уюмдардын символдорун же атрибуттарын атайылап колдонуу" беренеси менен кылмыш иши козголгон. Соттун чечими менен айыпталуучу үй камагына чыгарылган. Мамлекеттик айыптоочу биринчи инстанциядагы сот тарабынан кабыл алынган токтомго макул болбой, кассациялык арыз менен кайрылган. Баткен облустук соту кечээ, 1-мартта биринчи инстанциянын токтомун өзгөртүп, соттолуучуну 1 айга камакка алуу чечимин кабыл алды. Учурда бул факт боюнча иликтөө иштери улантылууда.