"Москвада 4 жашар кызды өлтүргөн" деп шектелген аялдын уулу Өзбекстанда камакка алынды

Орусиянын Москва шаарында "4 жаштагы Анастасия аттуу кызды муунтуп өлтүрүп, башын кесип салган" деген шек менен кармалган Гүлчехра Бобокулованын уулу 29-февралда Өзбекстанда камакка алынды. Бул тууралуу анын 62 жаштагы атасы Бахретдин Тураев кабарлаганын Орусиянын ММКлары жазып чыгышты.

Маалым болгондой, Гүлчехра Бобокулованын 19 жаштагы баласы Рахматилло 2015-жылдын ноябрь айында Москва шаарынан өз мекенине жөнөп кеткен. “Азыркы тапта балабыз эмне болгонун жана кайда экенин билбейбиз”,- деп билдирген Тураев.

Эскерте кетсек, 29-февраль күнү Москва шаарында 4 жашар кыз өлтүрүлүп, кыздын ата-энесинин үйү өрттөнгөн деген маалымат тараган. Ошол эле күнү Гүлчехра Бобокулова кыздын кесилген башын көчөгө көтөрүп чыгып, колго түшкөн. Кармалган аял 15 жылдан бери Психоневрологиялык диспансерде каттоодо турганы маалым болгон. Бул ишти иликтөө үчүн тергөөчү соттон Бобокулованы 2 айга, 29-апрелге чейин камакка алууну өтүнүп, ал камакка алынган.