Кыргыз мамлекетинен Ооганстанга 36 килограммдан ашуун баңгизатты алып өтүүгө аракет кылган тажик жарандары кармалышты (фото)

Баткен облусунан 36 килограмм 300 грамм баңгизаты менен Тажикстандын жарандары кармалышты. Бул тууралуу 3-март күнү Баңгизатты көзөмөлдөө мамлекеттик кызматынын басма сөз бөлүмүнөн билдиришти.

Маалым болгондой, 2016-жылдын 1-мартында Баткен облусунун Жаштык айылында Опель Вектра унаасы токтотулган. Унаа 49 жаштагы Тажикстандын ИИМ кызматкери И.М. аттуу жаранга тийиштүү болгону жана унаанын ичинде Дүйшөмбү шаарынын 45 жаштагы О.М. аттуу тургуну бар экени айтылган. Унааны текшерүү маалында 4 миллион сомдон ашуун акча каражатын түзгөн 36 килограмм 300 грамм гашиш заты табылган. Кармалгандар бул баңгизатты Ооганстанга чыгарып кетүүнү көздөшкөн. Факт боюнча "мыйзамсыз түрдө баңгизатты даярдоо, сактоо, таркатуу жана аны сатууга даярдоо" беренеси менен кылмыш иши козголду. Кармалгандар убактылуу кармоочу жайга жеткирилип, тергөө иштери жүрүүдө.