Ошто 9 баланын атасы жарандык никедеги аялын бычактап өлтүрүп, андан соң өз жанын кыюуга аракеттенди

Ошто 9 баланын атасы жарандык никедеги аялын бычактап өлтүрүп, өз жанын кыюуга да аракеттенди. Ал прокуратурага анын үстүнөн арыз жазганга бараткан аялын бычактап, өзү да жүрөгүнө бычак сайып өмүрүн кыюуга аракеттенген. Бул тууралуу бүгүн, 3-мартта SUPER KG порталына Ош ОИИБинин кызматкерлери билдиришти.

Маалыматка ылайык, окуя кечээ, 2-мартта саат 11:30 чамасында болгон. Анда 48 жаштагы О.Элмира аттуу аял күйөөсүнүн үстүнөн арыз жазуу үчүн райондук прокуратурага бара жаткан. Прокуратуранын имаратынын жанынан 59 жаштагы жарандык күйөөсү менен аялынын ортосунда уруш чыгып, Д.М. аялынын бөйрөк жана өпкө тарабына эки жолу бычак менен сайып жиберген. Кийин коркуп кетип өзүн да жүрөк тушуна сайып, өзүн өлтүрүүгө аракеттенген. Жабырлануучу аял ооруканага жетпей жолдон каза болгон, ал эми Д.М. аймактык оорукананын жандандыруу бөлүмүнө жеткирилген. Учурда анын абалы оор экени маалым. Бул факт боюнча “адам өлтүрүү” беренеси менен кылмыш иши козголуп, тергөө жүрүүдө.

Каза болгон О.Элмира аймактык дарыканада иштеп келген, анын артында 2 баласы калды. Ал эми кылмышка шектүүнүн 9 баласы бар экени жана ал пенсияда экени белгилүү болду.