Бүгүн Ош шаарынын борбордук аянтында Кыргыз Республикасынын туусунун кабыл алынган күнү белгиленди

Бүгүн, 3-мартта Ош шаарынын борбордук аянтында Кыргыз Республикасынын туусунун кабыл алынган күнү салтанаттуу түрдө белгиленди. Ага Ош шаарынын мэри Айтмамат Кадырбаев жетектеген мэриянын өкүлдөрү, шаардык кеңештин төрагасынын милдетин аткаруучу Арфидин Аланов, легендарлуу парламенттин депутаттары, жоокерлер, калаа тургундары жана студенттер катышышты. Бул тууралуу Ош шаардык мэриясынын басма сөз кызматы билдирди.

Калаа башчысы жалпы кыргыз элин, шаардыктарды 3-март – Мамлекеттик туу күнү менен куттуктады.
“Мамлекеттик туу - бул өзгөчө ыйык символ, анткени жаш жоокерлер тууну өөп ант беришсе, жогорку мартабалуу бийлик органдарынын өкүлдөрү эл алдында расмий ант берген учурда колдонулат. Ошондой эле туубуз 24 жыл ичинде республикалык жана дүйнөлүк ар кандай маанидеги иш-чараларда такай көтөрүлүп келүүдө. Мен айтар элем, ылайым элибиз ар дайым бүтүн болсун, элибиз эркин болсун, биздин ыйык туубуз өлкөбүздө жашаган бардык улуттарды бириктирип турсун. Мамлекеттик туубуз ар дайым биздин жеңиштерди дүйнө жүзүнө даңазалап желбирей берсин. Кайсы улуттун өкүлдөрү болсок да бири-бирибизди урматтап, сыйлап, эгемендүү мамлекетибиздин туусун ыйык сактап, рухий дөөлөттөрүбүздү кийинки муундарга бөксөртпөй үлгү катары өткөрөлү. Жергебизде тынчтыктын, эркиндиктин туусу бекем орноп, элибизде ынтымактын, достуктун түбөлүк сакталышына тилектештигимди билдирем”,- деди Айтмамат Кадырбаев.

Шаар мэри Айтмамат Кадырбаевдин тапшырмасы менен Мамлекеттик туу күнүнө карата Ош шаарындагы бардык мамлекеттик жана муниципалдык мекеме-ишканалардын жамааттарына атайын жыйындарды өткөрүү, алардын алдында орнотулган КРнын жана Ош шаарынын желегин жаңылоо, айланасын тазалоо жана көрктөндүрүү иштери жүргүзүлүп жатат.