Бишкекте МАИчилер айдоочу айымдарды токтотуп, майрамдык маанай тартуулашты. Бири күлсө, экинчиси ыйлады...

4-мартта баш калаадагы борбордук "Ала-Тоо" аянтында Бишкек шаардык жол-кайгуул кызматынын кызматкерлери (жаңы аталышы - патрулдук милиция), шоу жана бизнес чөйрөсүнүн өкүлдөрү айдоочу айымдарды келе жаткан 8-Март майрамы менен куттукташты.

Рулду башкарган айымдарды жол-кайгуул кызматкери токтоткон учурда алардын кабактары бүркөлүп, эмне себептен токтотулгандарын түшүнбөй жатышты. Алар жол эрежесин бузгандыгы үчүн эмес, белек тапшыруу үчүн токтотулгандарын уккандарында жылмаюулары пайда болуп, ыраазычылыктарын билдиришти. Айдоочу айымдар фотоаппараттардын сүрүнөн коркушту көрүнөт, көбү беттерин жаап, “Мен эмне кылдым? Тартпагыла!” деп кооптонсо, сүйүнүп көзүнө жаш алып рахмат айткандар да болду.

Айдоочу айымдарга көз жоосун алган жоогазындар, таттуу белектер жана жакшы маанай тартууланды.