Билл Гейтстин байлыгы бир жыл аралыгында 4,2 миллиард долларга азайса да, 2015-жылдын жыйынтыгы боюнча дүйнөдөгү эң бай адам бойдон калды

Америкалык "Forbes" басылмасы жыл жыйынтыгын чыгарып, дүйнөдөгү эң бай адамдарды атады. "Microsoft" ("Майкрософт") компаниясынын негиздөөчүсү Билл Гейтс 75 миллиард доллары менен дагы бир ирет "Дүйнөдөгү эң бай адам" деп табылды. Бул тууралуу басылма 1-мартта жазып чыкты.

"Бир жыл аралыгында 60 жаштагы Гейтстин байлыгы 4,2 миллиард долларга азайды, бирок ага карабай ал эң бай адамдардын сап башында турат. Акыркы 22 жыл аралыгында Билл Гейтс 17 жолу "Эң бай адам" деп аталды",- деп жазылат маалыматта. Экинчи орунда "Inditex" (ред. Zara, Massimo Dutti фирмалык бренддери) компаниясынын негиздөөчүсү - испан миллиардери Амансио Ортега. Анын байлыгы 67 миллиард долларды түзөт. Алдынкы үчтүктү америкалык инвестор Уоррен Баффетт 60,8 миллиард доллары менен толуктады. Ал эми Faсebook социалдык тармагынын негиздөөчүсү Марк Цукерберг 44,6 миллиард доллар байлыгы менен 6-орунда турат.