Нью-Йоркто дүйнөдөгү эң кымбат метро станциясы ачылды

Нью-Йоркто дүйнөдөгү эң кымбат "Oculus" аталышындагы метро станциясы ачылды. Бул тууралуу "Лента.Ру" басылмасы бүгүн жазып чыкты.

Ал дүйнөлүк соода борборунда жайгашкан. Таасирдүү конструкциясы америкалыктардын сынына кабылып, алар өкмөттү ашыкча чыгым сарптоодо деп айтып чыгышты.

Станциянын чатыры учуп бара жаткан ак кушту элестетет. Долбоордун автору - испаниялык сүрөтчү-футурист Сантьяго Калатрава. Метро станциясынын курулуш иштерине жалпысынан 4 миллиард долларга жакын акча каражаты жумшалган. Пландалгандан 2 эсе көп чыгым кетип, 5 жылда бүтүрүлчү долбоор 12 жылга созулган. "Forbes" басылмасына таянсак, курулушка рекорддук суммадагы акча каражаты кеткен.

"Oculus" транспорттук түйүнү 11 метрополитен жолун шаардын айланасындагы темир жол каттамдары менен байланыштырат. Суткасына бул станция аркылуу 250 миң жүргүнчү өтүп турат. Метро станциясы ачылганына карабастан, курулуш иштери дале уланууда. Маалыматка ылайык, оңдоп-түзөө иштери дагы бир канча айга уланат.