Орусияда кыргыздарга жасалма документ даярдап берип жүргөн кылмыштуу топ кармалды

Орусияда кыргыздарга жасалма документ даярдап берип жүргөн кылмыштуу топ кармалды. Орусиядагы кыргыз элчилигинин билдиришинче, шектүү жарандар: Ы.Н., 1973-жылкы, Б.Н., 1988-жылкы, Ж.О., 1994-жылкы, К.К., 1994-жылкы, Р. уулу У., 1998-жылкы.

Кылмыштуу топ Кыргыз Республикасынын элчилигинен алыс эмес жерде жайгашкан кеңселердин биринде жасалма документтерди жасоо жана берүү менен алектенип, анын ичине Кыргыз Республикасынын Орусиядагы элчилигинин консулдук бөлүмүнүн документтерин: баланын жарандыгын аныктоодо бериле турган, туулгандыгы тууралуу күбөлүккө кошо берилчү тиркеме, нотариалдык документтер, мекенге кайтуу күбөлүгү жана башка документтерди да жасалма даярдоо менен алектенип келгени айтылды.

Мунун кесепетинен мамлекетибиздин жарандары гана эмес, башка КМШ өлкөлөрүнүн жарандары да жабыр тартышып, административдик айыпка жыгылып, депортация жана “кара тизмеге” түшүүгө дуушар болушкан. Факт боюнча кылмыш иши ачылып, топтун башка мүчөлөрүн кармоо аракеттери жүрүп жатканы айтылат маалыматта.