Кыргыз жеринде бир нече кылмыштарга шектелип эл аралык издөөдө жүргөн кыргыз жараны Орусиядан кармалды

Кыргыз жеринде бир нече кылмыштарга шектелип эл аралык издөөдө жүргөн 21 жаштагы кыргыз жараны Пермь шаарынан кармалды. Бул тууралуу 7-март күнү жергиликтүү массалык маалымат каражаттары жазып чыгышты.

Маалыматка ылайык, кылмышка шектүү 2015-жылдын октябрь айында Жалал-Абад облусунан жаранды бычак менен бир нече жолу сайып өлтүрүп, экинчисин жарадар кылып, окуя болгон жерден изин жашырып кеткен. Ага карата "адам өлтүрүү", "бейбаштык", "алсыз абалдагы адамга карата зордук- зомбулук көрсөтүү" беренелери боюнча кылмыш иштери козголгон. Ал өлкө аймагынан табылбагандыктан, ага эл аралык издөө жарыяланган. Кылмышка шектүү 8-февраль күнү Пермь шаарынан кармалган.

"Кармалган жаран кылмыш иштерин өз мекенинде кылгандыктан, ал өз мекенине жөнөтүлөт. Бул факт боюнча тиешелүү документтер чогултулуп, Орусиянын Башкы прокуратурасына жөнөтүлдү",- деп айтылат маалыматта.