Ош шаарындагы түнкү клубдардын биринин жанынан 20 жаштагы жигит бычактан жаракат алды

Ош шаарындагы түнкү клубдардын биринин жанынан 20 жаштагы жигит бычактан жаракат алды. Бул тууралуу бүгүн, 7-мартта SUPER.KG порталына Ош шаардык ички иштер башкармалыгынан билдиришти.

Маалыматка ылайык, окуя 4-март күнү түнкү саат 02:00 чамасында А.Масалиев көчөсүндө жайгашкан түнкү клубдун жанында орун алган. Анда пикир келишпестиктен улам жигиттердин арасында уруш чыгып, натыйжада 20 жаштагы Н.М. аттуу жигит бычактан жаракат алып, аймактык ооруканага жеткирилген.

"Жүргүзүлгөн иликтөө иштеринин алкагында ошол эле күнү кылмышка шектүү катары Ош шаарынын 21 жаштагы тургуну кармалган. Учурда бул факт боюнча "адам өлтүрүүгө аракет жасоо" беренеси менен кылмыш иши козголуп, иликтөө иштери улантылууда", - деди Ош шаардык ички иштер башкармалыгынын басма сөз кызматынын өкүлү Замир Сыдыков.