Ысык-Көлдө иниси агасын темир түтүк менен сабап өлтүрдү

Ысык-Көл облусунун Балыкчы шаарынын 42 жаштагы тургуну мас абалында агасын темир түтүк менен сабап өлтүрдү. Бул тууралуу 9-март күнү Ысык-Көл ОИИБинин басма сөз кызматынан билдиришти.

Маалым болгондой, 8-март күнү саат 21:40 чамасында Балыкчынын шаардык ооруканасына оор жаракаттарды алган 46 жаштагы Таалай аттуу адамды алып келишкен. Жабырлануучу алган жаракаттарынан улам өзүнө келе албай каза болуп калган. Териштирүүдөн кийин кылмышка шектүү катары маркумдун 42 жаштагы Кылыч аттуу иниси кармалып, ал агасын сабап өлтүрүп алганын мойнуна алды. Ал 8-мартта саат 18:00 чамасында ата-энесинин үйүнө барып, агасы экөө урушуп кетип, аны жерге жаткырып темир түтүк менен бир канча жолу уруп койгонун айткан. Милиция кызматкерлери ата-энесинин үйүнүн тегерегин кароодо кандын тактарын көрүшкөн. Аталган факт боюнча кылмыш иши козголуп, тергөө иштери башталды.