25-40 жашка чейинки аскер кызматын өтөбөгөн жарандарга 50 миң сом төлөп, бир айлык аскер кызматынан өтүү сунушталууда

25-40 жашка чейинки аскер кызматын өтөбөгөн жарандар үчүн мобилизациялык резервден өтүү сунушталууда. Бул тууралуу бүгүн, 9-мартта маалымат жыйынында Коргоо иштери боюнча мамлекеттик комитетинин Аскердик башкаруунун жергиликтүү органдарынын башкы башкармалыгынын 2-башкармалыгынын башчысы Арстан Керималиев билдирди. Анын айтымында, мындай мыйзам долбоору учурда каралып жатат.

"Учурда 25тен 40 жашка чейинки жарандарыбыз алгачкы аскер кызматына чакырылып, анда 12 күн Аскер комиссариатында жана 10 күн Куралдуу күчтөрдө кызмат өтөп, мамлекеттин казынасына 25 миң сом төлөө менен экинчи категориядагы аскер билетин алышат. Буга байланыштуу акыркы 3 жылда өткөрүлгөн анализдин жыйынтыгы менен болгону 400-450 жаран аталган аскер кызматын өтөгөн. Мындан улам биз алгачкы чакырылыштын ордуна мобилизациялык резервден өтүүнү сунуштап жатабыз. Ага ылайык, 25-40 жаштагы аскер билети жок, альтернативдик кызмат өтөбөгөн жарандар мамлекетке 50 миң сом төлөп, бир айлык аскер кызматынан өтүшсө болот",- деди полковник.