Ош шаарында 12 кабаттуу үйдү мыйзамсыз куруу аракеттери болууда

Ош шаарынын Масалиев көчөсүндө курулуш ишканаларынын бири тарабынан тийиштүү архитектуралык документтери жок 12 кабаттуу үй мыйзамсыз курулуп баштаган. Бул тууралуу Мамлекеттик экологиялык-техникалык инспекциянын басма сөз кызматы билдирди.

2013-жылы инспекциянын Ош шаардык кызматкерлери тарабынан акт түзүлүп, керектүү документтери толукталмайынча курулуш иштерин жүргүзүүгө тыюу салынган. Бирок курулуш ишканасы мыйзамга баш ийбей, курулуш иштерин улантууга аракет жасаган. Берилген эскертүүлөргө баш ийбеген ишкананын ишин инспекция сотко өткөрүп берген. Курулуш иштерин сот карап, териштирүү иштери жүргүзүлгөнү менен, аталган ишкананын жетекчилиги да, тиешелүү өкүлдөрү да келген эмес.

Курулуш иштерин жүргүзүүдө мындай мыйзам бузуу менен иш алып бара жаткан ишканалар Кыргыз Республикасы боюнча ондоп саналат. Андыктан Мамлекеттик экологиялык-техникалык инспекция кызматы мыйзамсыз жүргүзүлүп жаткан курулуш иштерин тынымсыз көзөмөлгө алып, коюлган талаптарга жооп бербесе, мыйзам чегинде катуу чаралар көрүлөрүн эскертти.