"ЭЛДИК КАБАРга" жооп: Оштогу гаражда жашаган 90 жаштагы карыя электр энергиясын бекер кылып, көмүр түшүрүп берүүнү талап кылууда

Ушул жылдын 6-мартында "Элдик кабар" рубрикасына гаражда жашаган 90 жаштагы апа тууралуу маалымат чыккан.

Зейнеп Абдыкарова балдары менен 15 жыл мурун Тажикстандан көчүп келип, кайрылман макамына ээ болуп, андан соң Кыргыз Республикасынын жарандыгын алышканы маалым болду. Ошондой эле балдарына өкмөт тарабынан Кара-Суу жана Алай райондорунан жер тилкеси бөлүнүп берилген. Азырынча иликтөөлөр дагы да уланып жатат. Бул тууралуу Эмгек жана социалдык өнүгүү министрлигинин Ош шаарындагы өкүлү Гүлзина Раева SUPER.KG порталына билдирди.

"Зейнеп Абдыкаровага катталган жери боюнча тиешелүү жардамдар көрсөтүлүп келген. Анын уулу 1970-жылкы Эшпай Турдукулов өз энесинен кабар алып, жардам берип келген. Ал Кара-Суу районунда үй-бүлөсү менен өзүнүн үйүндө турат. Баласы энесин бага ала турган мүмкүнчүлүгү бар болгону менен, энеси баласы менен жашоого каршы экенин билдирген",- дейт Раева.

Гүлзина Раеванын айтымында, Зейнеп Абдыкарова жашаган жай суук, караңгы, эч кандай шарты жок, санитардык талаптарга жооп бербейт.

"Биз "балдарыңызга барыңыз, бул жакта сизге жашаган болбойт" десек, "анда силер мага электр энергиясын бекер кылып, көмүр түшүрүп, жардам бергиле" деп айтты. Биз өзүбүздүн аймакта катталган жарандарга гана материалдык жардам бере алабыз. Зейнеп Абдыкарова Кара-Суу районунда катталган",- деди Гүлзина Раева.