Бишкек шаарынын мэри Албек Ибраимов биринчи пландык чогулушун өткөрдү

Мэриянын жыйналыштар залында шаар мэри Албек Ибраимовдун катышуусунда алгачкы пландык жыйналыш өттү. Бул тууралуу Бишкек шаардык мэриясынын басма сөз кызматы билдирди.

Анда КМШ өлкөлөрүнүн башчыларынын кезектеги жолугушуусуна жана 2016-жылы Кыргыз Республикасында өтө турган түрк тилдүү өлкөлөрдүн башчыларынын жолугушуусуна даярдык иштери талкууланды.
Турак жай-коммуналдык чарбасын башкаруу жетекчиси Канатбек Эшатовдун айтымында, учурда бак-дарактарды, гүлдөрдү отургузуу, жарык берүүнү оңдоп-түзөө иштери жүрүп жатат. Ошондой эле газондорду тазалоо, таш төшөлгөлөрдү алмаштыруу, аң-чуңкурларды оңдоп-түзөөдөн өткөрүү пландалууда.
1-марттан тарта Бишкекте санитардык тазалоо боюнча 3 айлык жарыяланды. Ишемби, 12-мартта биринчи ишембилик өткөрүлөт.
Күн тартибинде Нооруз майрамына карата даярдыктар да каралды. Маданият башкармалыгы "Ала-Тоо" аянтында өтө турган иш-чаранын жүрүшү тууралуу сценарийди тартуулады.
Жыйналыштын акырында шаар мэри Албек Ибраимов бардык кызматтын өкүлдөрүнө жазга жана Нооруз майрамына карата жумушту күчөтүү керектигин айтты.