Футбол боюнча Франциянын чемпиондугунда ПСЖ клубу атаандашын 9:0 эсебинде утту, команда мөөнөтүнөн мурун чемпион болду

Футбол боюнча Франциянын биринчилигинин 30-турунда ПСЖ клубу конокто "Труаны" 0:9 эсебинде утуп, мөөнөтүнөн мурун чемпион аталды. Оюнда Златан Ибрагимович 4 голу менен айырмаланса, Эдинсон Кавани 2 гол киргизди. Андан тышкары Адриен Рабио жана Хавьер Пасторе бирден голу менен айырмаланса, дагы бир голду "Труанын" оюнчусу Матьё Сонье өз дарбазасына киргизип алды.

Бул жеңиште 3 упайга ээ болгон ПСЖ мелдеш жадыбалында 2-орунда келе жаткан "Монакону" 25 упай артка калтырды. Париждиктер муну менен мелдеш жыйынтыкталарына 8 тур калганда чемпиондукту камсыздап, жаңы рекорд жаратышты.

Оюнда 4 гол киргизген Златан Ибрагимович сезондо киргизген голдорунун санын 27ге жеткирди. Бомбардирлердин катарында кийинки орунду ээлеп турган Эдинсон Каванинин эсебинде 14 гол бар.