Казакстандагы "Рио-де-Жанейро-2016" Олимпиадасына жолдомо ойнотулуучу мелдешке 13 кыргыз балбаны катышат (тизме)

18-20-март аралыгында Казакстандын Астана шаарында күрөш боюнча "Рио-де-Жанейро-2016" Олимпиадасына жолдомо ойнотулуучу мелдеш өтөт. Грек-рим күрөшү, эркин күрөш жана кыз-келиндердин эркин күрөшү боюнча өтө турган мелдешке Азия чөлкөмүнөн 24 мамлекеттин балбандары катышмакчы.

Анда Олимпиада оюндарына күрөштүн 3 түрүнөн 36 жолдомо ойнотулмакчы. "Рио-де-Жанейро-2016" Олимпиадасына жолдомо алуу үчүн балбандар өз салмагында алдынкы 2 орундун бирин ээлегенге тийиш.

Бул мелдешке кыргыз балбандары жоон топ болуп жөнөп жатышат. Жолдомо алууга кимдер жөнөп жатышат, курамдар менен тааныштырмакчыбыз.

Астанадагы мелдеште грек-рим күрөшү боюнча 6 салмакта (59 килограмм салмакта, 66 кг, 75 кг, 85 кг, 98 кг, 130 кг) жолдомолор ойнотулат. Грек-рим күрөшү боюнча кыргыз өлкөсүнүн курамына 5 балбан кирген. Алар: Роман Царев (66 кг), Атабек Азисбеков (75 кг), Жанарбек Кенжеев (85 кг), Узур Жузупбеков (98 кг), Мурат Рамонов (130 кг).

Эркин күрөш боюнча 6 салмакта жолдомолор ойнотулат (57 килограмм салмакта, 65 кг, 74 кг, 86 кг, 97 кг, 125 кг). Эркин күрөш боюнча өлкөнүн курамасында 6 балбан бар. Алар: Самат Надырбек уулу (57 кг), Эламан Догдурбек уулу (65 кг), Ильгиз Жакыпбеков (74 кг), Алигаджи Гамидгаджиев (86 кг), Магомед Мусаев (97 кг), Айаал Лазарев (125 кг).

Ал эми кыз-келиндер арасында дагы 6 салмакта жолдомолор ойнотулуп (48 кг, 53 кг, 58 кг, 63 кг, 69 кг, 75 кг), Олимпиаданын катышуучулары аныкталмакчы. Кыз-келиндер курамасынын машыктыруучусу Нурбек Изабеков мелдешке 2 гана кыргыз кызы катышарын билдирди. Бири Азия чемпиону Айсулуу Тыныбекова болсо (58 кг), экинчиси Айжаркын Жеңишбек кызы (53 кг).