Бишкекте күйөөсүн жиликтеп, анын дене бөлүктөрүн шаардын ар кайсы райондоруна таштаган келиндин иши боюнча соттук отурум 24-мартка жылдырылды

Бүгүн, 14-мартта Бишкек шаарынын Октябрь райондук сотунда күйөөсүн жиликтеп, анын дене бөлүктөрүн шаардын ар кайсы райондоруна таштаган 26 жаштагы С.Айдайдын иши боюнча биринчи соттук отурум болмок. Соттук отурумга айыпталуучунун жактоочусу келбей калгандыгына байланыштуу соттук кароо 24-мартка жылдырылды. Бул тууралуу SUPER.KG порталына бүгүн, 14-мартта Октябрь райондук сотунан билдиришти.

Маалыматка ылайык, күйөөсүн өлтүрүүгө шектелген 26 жаштагы С.Айдай 2015-жылдын 18-августунда кармалган. Ал өз көрсөтмөсүндө күйөөсү экөөнүн ортосунда уруш чыгып, аны бычактап, кийин аны жиликтеп салганын билдирген. Кылмышка шектүү 2013-жылы Кыргыз мамлекеттик медициналык академиясын бүтүргөнү маалым.

Айта кетсек, 2015-жылы 14-августта Бишкектин 5-кичи районунда таштанды челектеринин биринен эркек адамдын дене бөлүктөрү: кесилген колдору жана буттары табылган. Анын эртеси өлтүрүлгөн адамдын башы Фучик көчөсүнөн, денесинин дагы бир бөлүгү борбордогу чайканалардын биринин жанынан чемоданга салынган абалда табылган. Тергөөнүн жүрүшүндө кылмышка шектүү катары маркумдун аялы кармалып, ал кылмышын моюнга алган. Кылмышка шектүү менен маркум Эрлан Оркошов 4 жыл бирге жашашкан, ортосунда 2 уулу бар.