Жалал-Абадда "бир тууган эжесинин небересин өлтүргөн" деп айыпталып жаткан аял 3 жылга эркинен ажыратылды

Жалал-Абадда "бир тууган эжесинин небересин өлтүргөн" деп айыпталып жаткан аял 3 жылга эркинен ажыратылды. Бул тууралуу 15-мартта Жогорку Соттун басма сөз кызматынан билдиришти.

Маалым болгондой, 2015-жылдын сентябрь айында Ы.Истамбаева аттуу жаран өзүнүн бир тууган эжесинин 8 жаштагы небересин тарбиялоого алган. Кызды Карача айылынын №8-орто мектебине киргизип, өз балдары менен чогуу багып жаткан.

7-декабрь күнү болжол менен саат 21:00дө Истамбаеванын өзүнүн балдары арызданышып, ал кыз сабактарын жазбай жатканын айтышкан. Ошол маалда мас абалындагы күйөөсүнө ачууланып жаткан Истамбаева бөлмөнүн ичинде турган жыгач таяк менен бир канча жолу кыздын башына, колуна урган. 8-декабрда кыз окууга бара жатканда жыгылып калган. Ооруканага жеткирилгенден кийин кыз каза болгон.

Факт боюнча Ы.Истамбаеванын үстүнөн “денеге атайын залал келтирүү менен байкабастан жабырлануучуну өлүмгө алып келүү” беренеси менен кылмыш иши козголуп, Базар-Коргон райондук сотунун чечими менен 29-февраль күнү айыпталуучу 3 жылга эркинен ажыратылган. Соттун чечими менен макул болбогон тарап Жалал-Абад облустук сотуна кайрылган. Кылмыш ишин облустун соттук коллегиясы караган соң, ага карата юридикалык баа берилет.