КҮНСЕРЕП: Мартта берилчү жаңы автоунаа номурларынан дайын жок... Ишкер аялы менен балдарын үйүнө киргизбей жатат...

Бүгүн, 16-март. Өлкөнүн коомдук, саясий турмушунда бир катар окуялар болду. Мамлекет жетекчилигинин кадамдары, өлкө борборунда жана аймактарда орун алган иш-чаралар... Күн ичинде болгон окуяларга саресеп салабыз...

Өлкөдө автоунааларга жаңы үлгүдөгү мамлекеттик номурлар качан берилери белгисиз. 2015-жылдын декабрь айында Мамлекеттик каттоо кызматы мамлекеттик номурлар жаңыланарын жарыялап, аракеттер башталганын маалымдаган эле. Мекеме сунуштаган үлгү жактырылып, аны бекитүүгө премьер-министр Темир Сариев буйрук чыгарган. "Жаңы номурлар 2016-жылдын мартында бериле баштайт, даярдалып бүттү" деп билдиришкен расмий органдар.

Март ортолоп калганы менен, жаңы номурлардан азырынча кабар жок. Мамкаттоо кызматынан бүгүн, 16-мартта так жооп билдире алышпады. Тийиштүү компания менен келишим түзүлгөнү, бардык процедуралар бүтсө берилип баштай турганы тууралуу гана жооп узатылды...

Жогорку Кеңештин тармактык комитетинин кийинки жыйынында электр энергиясынын тарифтери боюнча өкмөттүн маалыматын угат. Комитеттин акыркы жыйынында "Электр энергиясын импорттоо болбой жатса деле эмнеге элди 2 сом 16 тыйындан төлөтүп жатасыңар?" деген суроого өкмөт өкүлдөрү так жооп айта алышкан эмес. Депутаттар свет үчүн карапайым эл негизсиз чыгым болуп жатканын айтышып, тарифтерди кайра карап чыгууну сунушташты...

Белгилей кетсек, 2 сом 16 тыйын деген тариф мурунку жылдары Казакстандан электр энергиясын сатып алып жаткан маалда коюлган. "Электр энергиясын сатып алып жатабыз, ошого светтин баасы көтөрүлдү" дешкен. 2015-жылдын октябрынан бери сырттан электр энергиясын сатып алуу боло элек, бирок тарифтер өзгөрүүсүз калууда.

Бишкекте бүгүн, 16-мартта чуулуу ишкердин үй-бүлөлүк чырына байланыштуу жаңы жагдайлар ачылды. Тагыраагы, ишкер Нарынбек Сариев жубайын 3 баласы менен үйүнө киргизбей жатканын айтып жубайы Анара Сариева SUPER.KG порталына кайрылды. "Кароолчуга "келсе киргизбегиле" деп дайындап коюптур. Жолдошум көрүнгөн шылтоону айтып, менин үстүмдөн иш козгото албай жатат",- дейт жубайы.

Белгилей кетсек, ишкер Нарынбек Сариев аялынын үстүнөн Октябрь РИИБине арыз менен кайрылганын айткан. Анда аялы белгисиз бир адамдын коштоосунда үйүнө кирип сейфтеги документтерди уурдап кеткенин маалымдаган эле. Райондук милиция маалыматты четке кагып, "документ уурдоо фактысы боюнча ишкер арыз жазган эмес" деп билдирди.

Өкмөт жол кырсыктарын азайтуу, "ала таякты" тоготпос айдоочуларды тизгиндөөгө дагы бир аракет баштаганы жатат. Ички иштер министрлигинин Жол-кайгуул башкармалыгынын жетекчисинин орун басары Ыманалы Саркулов эми эреже бузгандарга ыкчам чара көрүлөрүн билдирди.

Жол-кайгуул кызматы менен Кайгуул-күзөт кызматы бириктирилди. Эми жол кыймылын Патрулдук кайгуул-милициясынын инспекторлору көзөмөлдөшөт. Алардын көкүрөгүнө (кийимине) 8 саат тынымсыз иштөөгө жөндөмдүү видеокамералар тагылат. Жаңы орган 1-апрелден баштап Бишкек шаарында, Чүй жана Ысык-Көл облустарында ишке киргизилип, 1-июлдан баштап аймактарда иштеп баштамакчы. Өзгөрүү канчалык жыйынтык берерин убакыт көрсөтөт.

Алмазбек Атамбаев Ош шаарына иш сапары менен барды. Суу тосмонун ачылышында сүйлөгөн сөзүндө мамлекет башчы жергиликтүү тургундарды элди бөлгөн адамдарга азгырылбоого чакырды.

"Кыргыздар бөлүнгөн эмес, бузукуларга ишенбегиле. Ош шаары менен кыргыздар сыймыктанат. Кээ бир адамдар кан төгүлгөн сайын акча табышат. Аларга келечек, ынтымактын кереги жок, байлык гана керек. Эмдиги жылы президенттиктен кеткенден кийин айылымда калам. Кудайга шүгүр, Кудай бизге жардам берип жатат. Апрель айындагы окуяны туура нукта чагылдыра албай жатабыз. Ал окуя Аксыдан башталган. Силер көп нерсе билбейсиңер, жакында баарын көрсөтөбүз",- деди президент.