Бишкекте "10 жаштагы кызды окуу бөлмөсүнө камап алып, ыплас аракеттерди жасаган" деп шектелген мугалим кармалды

Бишкекте "10 жаштагы кызга карата ыплас аракеттерди жасаган" деп шектелген мугалим кармалды. Муну 18-март күнү Бишкек ШИИББинин басма сөз кызматынан билдиришти.

Маалым болгондой, милицияга арыз менен Сокулук районунун 27 жаштагы тургуну кайрылган. Ал февраль айынын башында Л.Толстой көчөсүндө жайгашкан балдар борборунун мугалими кошумча сабактарга катышып жүргөн 10 жаштагы кызынын дене-башын кармалап, ыплас аракеттерге барганын, мындай аракеттерди окуу бөлмөсүнүн эшигин бекитип алып жасаганын билдирген. Жүргүзүлгөн ыкчам издөө иштеринин алкагында кылмышка шектүү катары Бишкек шаарынын 44 жаштагы С.В. аттуу тургуну кармалган. Учурда тергөө иштери жүрүүдө.