Орусияда кырсыкка учураган учактан 28 жаштагы кыргыз жараны да каза тапканы аныкталды

Ростов-на-Донуда кырсыкка учураган учактан кыргыз жараны, стюардесса Жылдыз Насирдинова каза тапканын жергиликтүү массалык маалымат каражаттары жазып чыгышты.

Маалыматка ылайык, Орусиянын Өзгөчө кырдаалдар министрлиги кырсыктаган учактын экипаж мүчөлөрүнүн аты-жөнүн жарыялады. Алардын арасында стюардесса, Кыргыз Республикасынын жараны, 28 жаштагы Жылдыз Насирдинова да бар.

Айта кетсек, Ростов-на-Дону шаарында Дубайдан учуп келген учак аба майданына коно албай, учактын экипаж мүчөлөрү жана 55 жүргүнчүсү каза тапты. Кырсыкка учураган Boeing-737-800 үлгүсүндөгү учак дубайлык "FlyDubai" компаниясына таандык болгон. Алдын ала маалыматтарга ылайык, учак аба майданына коно албай, экинчи жолку аракетинде аэропорттун аймагына кулап, жарылган. Айрым эксперттердин айтымына караганда, учактын күйүүчү майы түгөнүп, кырсык ошол себептен да болушу мүмкүн. Себеби кырсыктаган учак аба ырайына байланыштуу коно албай, абада көп убакыт болгон деп болжолдонууда.