Канатбек Бегалиев: "Бразилиядагы Олимпиада оюндарында грек-рим күрөшү боюнча улуттук курам 2 медаль алууну көздөйт"

"Рио-де-Жанейро-2016" Олимпиадасында грек-рим күрөшү боюнча улуттук курама команда 2 медаль тагынууну максат кылып жатат. Бул тууралуу курамдын башкы машыктыруучусу Канатбек Бегалиев 22-мартта маалымат жыйынында билдирди.

Анын айтымында, Астанада өткөн Олимпиадага жолдомо ойнотулуучу мелдеште кыргыз балбандары алдынкы орунду ээлеп, Иран, Япония жана башка мамлекеттерди артка калтырды.

Кошумчалай кетсек, Астанада өткөн мелдеште кыргыз спортчулары жалпысынан 4 жолдомо алып келишти. Алардын экөөнү грек-рим күрөшүнүн өкүлдөрү Жанарбек Кенжеев менен Мурат Рамонов алса, эркин күрөштүн өкүлдөрүнөн Магомед Мусаев Олимпиадага катышуу укугуна ээ болду. Ал эми кыз-келиндер күрөшүндө Айсулуу Тыныбекова алтын медаль тагынып, буга катар жолдомого ээ болду. Буга чейин грек-рим күрөшүнөн Арсен Эралиев жолдомо алган.