Баткен облусунда адам уурдоо фактысына шектелип 4 адам кармалды

Баткен облусунда адам уурдоо фактысына шектелип 4 адам кармалды. Бул тууралуу аталган облустун Ички иштер башкармалыгынан билдиришти.

Маалыматка ылайык, 15-мартта саат 14:00 чамасында Кадамжай районунун Марказ айылындагы кесиптик лицейде кароолчу болуп иштеген Лачынбек К. аттуу жаранды Ноокат районунун Жаңы-Ноокат айылынын 27 жаштагы Нодира аттуу тургуну 3 жигит менен келип, аны унаага салып кеткен. Аны 3 күн бою Ош шаарындагы үйлөрдүн биринде себепсиз кармап отурушкан.

Жүргүзүлгөн иликтөө иштеринин алкагында Баткен ОИИБинин уюшкан кылмышка каршы күрөшүү бөлүмүнүн кызматкерлери тарабынан аталган жаран бошотулган. Бул факт боюнча "адам уурдоо" беренеси менен кылмыш иши козголуп, кылмышка шектүү катары 4 адам кармалып, убактылуу кармоочу жайга киргизилди. Учурда иликтөө иштери жүрүүдө.