6 жолку Олимпиада чемпиону Усэйн Болт Бразилиядагы Олимпиадада дагы 3 медаль тагынууну максат кылууда

Ямайкалык жөө күлүк Усэйн Болт "Рио-де-Жанейро-2016" Олимпиадасында 3 алтын медаль тагынууну максат кылууда.

Анын айтымында, бул анын карьерасындагы акыркы Олимпиада болмокчу. Чет элдик маалымат булактары кабарлагандай, Болт 200 метр аралыкты 19 секундада басып өтүп, өз рекордун жаңылоо ниетинде (мурунку рекорду 19,19).

"Дагы 4 жыл спорттук калыбымды сактап, 2020-жылкы Олимпиада оюндарында алтын медаль тагынам деген максат менен жашоо мүмкүн эмес. Андыктан Риодо максатыма жетсем, баары ойдогудай болот. Менин башкы максаттарымдын бири - 200 метр аралыкты 19 секундада багындыруу жана 3 алтын медаль тагынуу",- дейт 29 жаштагы спортчу.

Кошумчалай кетсек, 5-21-август аралыгында өтө турган "Рио-де-Жанейро-2016" Олимпиадасында 28 спорт түрүнөн 306 комплект медаль ойнотулмакчы.

Кыргыз мамлекетинин желеги астында аталган мелдешке катышуу укугун азырынча 8 гана спортчу алды. Жолдомону балбандардан Айсулуу Тыныбекова, Арсен Эралиев, Жанарбек Кенжеев, Мурат Рамонов, Магомед Мусаев алса, жеңил атлеттерден Мария Карабицкая, Юлия Андреева, Дарья Маслова алган.